Kasper Hjulmand, þjálfari danska karlalandsliðsins í knattspyrnu, tilkynnti í gærkvöldi hvaða leikmenn fara með á HM í Katar síðar í mánuðinum.  Hann lokaði þó glugganum ekki alveg því fimm sæti eru enn til ráðstöfunar í hópnum og hafa leikmenn þessa viku til að sýna sig og sanna fyrir þjálfaranum.

Það er eftir miklu að slægjast að fá að fara með liðinu á HM. Það er að sjálfsögðu mikill heiður og væntanlega toppurinn á ferli margra að spila á HM en það eru líka háar fjárhæðir í boði fyrir þátttökuna.

Í fréttatilkynningu frá samtökum leikmanna kemur fram að hver leikmaður fái sem svarar til um 100 milljóna íslenskra króna í sinn hlut ef liðið sigrar á mótinu.

Það er kannski ekki raunhæft að Danir vinni mótið en það þýðir ekki að leikmennirnir fari slippir og snauðir heim að móti loknu. Fyrir það eitt að vera valdir í liðið fær hver leikmaður sem svarar til um 17,5 milljóna íslenskra króna.

Ef liðið kemst í sextán liða úrslitin hækkar upphæðin í 27,5 milljónir. Átta liða úrslit gefa 36,7 milljónir og undanúrslit 56,8 milljónir.

Ef liðið verður í þriðja sæti á mótinu fær hver leikmaður 62 milljónir og ef liðið verður í öðru sæti tikka 66,5 milljónir inn á bankareikninga leikmannanna.