Rico Lewis varð í gær yngsti leikmaðurinn til að skora í fyrsta byrjunarliðsleik sínum í Meistaradeild Evrópu.

Hinn 17 ára gamli Lewis lék í hægri bakverðinum fyrir Manchester City í 3-1 sigri á Sevilla í gær. Hann skoraði fyrsta mark City í leiknum og jafnaði með því í 1-1.

Lewis verður átján ára þann 21. nóvember.

City vann riðil sinn fremur örugglega. Borussia Dortmund fylgir þeim áfram í 16-liða úrslit.

Sevilla og Íslendingalið FC Kaupmannahafnar voru einnig í riðlinum sem um ræðir. Spænska liðið hafnaði í þriðja sæti og það danska á botninum.

FCK og Dortmund mættust einmitt í gær og gerðu 1-1 jafntefli. Þar skoraði hinn 19 ára gamli Hákon Arnar Haraldsson mark Kaupmannahafnarliðsins og var sömuleiðs valinn maður leiksins að honum loknum.