Frá því í ágúst 2018 og út júlí á þessu ári fékk Íslög, sem er lítil lögmannsstofa í eigu hjónanna og lögmannanna Steinars Þórs Guðgeirssonar og Ástríðar Gísladóttur, 76,2 milljónir króna frá fjármálaráðuneytinu fyrir lögfræðiþjónustu.

Fréttablaðið skýrir frá þessu í dag og segir þetta vera 55% af öllum lögfræðikostnaði ráðuneytisins á þessu tímabili.

Sigurður Þórðarson, sem var settur ríkisendurskoðandi til að fylgjast með framkvæmd samnings á milli fjármálaráðuneytisins og Lindarhvols ehf., gerði alvarlegar athugasemdir við starfsemi Lindarhvols. Lindarhvoli var falið að selja eignir sem ríkið fékk í stöðugleikaframlag frá þrotabúum föllnu bankanna.

Í greinargerð Sigurðar gagnrýndi hann mjög mikil umsvif Steinars Þórs á vegum Lindarhvols. Lögmannsstofa hans fékk 120 milljónir frá Lindarhvoli á þeim tveimur árum sem félagið starfaði. Frá því að starfsemi Lindarhvols var hætt í febrúar 2018 hefur félagið greitt lögmannsstofu Steinars rúmlega 20 milljónir til viðbótar. Samtals nema greiðslurnar 140,5 milljónum.

Frá 2016 hafa Íslög fengið tæpar 217 milljónir frá fjármálaráðuneytinu og Lindarhvoli.

Þess utan hefur Steinar sinnt verkefnum fyrir Eignasafn Seðlabankans.

Samkvæmt reglugerð fjármálaráðuneytisins um vöru- og þjónustukaup eiga opinberir aðilar að bjóða verkefni út ef verðmæti þeirra er meira en 18,5 milljónir króna.