Ásgerður Stefanía Baldursdóttir fyrrum leikmaður Vals og nú þjálfari hjá félaginu var gestur í Íþróttavikunni með Benna Bó á föstudagskvöld en með henni í setti var Hörður Snævar Jónsson, fréttastjóri íþrótta á Torgi.

Ásgerður ákvað á dögunum að leggja skóna á hilluna eftir magnaðan feril en hún lék á ferlinum 10 A-landsleiki.

„Það hefur nú lítið reynt á það en er sátt með þessa ákvörðun. Ég var klár líkamlega og andlega í þessa ákvörðun,“ sagði Ásgerður um hið nýja líf sem fyrrum knattspyrnukona.

Ásgerður er tveggja barna móðir en hún segist hafa fundið það að nú væri rétti tímapunkturinn til að hætta.

„Maður finnur það smátt og smátt, það kom allt í einu. Eftir að ég átti seinni stelpuna mína þá ákvað ég að taka slaginn aftur, ég fékk heilræði frá manni innan Vals að ég myndi finna það þegar ég ætti að hætta. Ég ætti ekki að hætta fyrr. Svo kom tilfinning, neistinn var að minnka og mjöðmin í veseni. Þá er bara betra að hætta.“

Ásgerður varð sjö sinnum Íslandsmeistari á ferlinum og fjórum sinnum bikarmeistari. Magnaður ferill.

„Það er bara gaman, gaman að taka þátt í uppbyggingu í Garðabæ og svo ná aftur í titlana á Hlíðarenda.“

Umræðan um þetta er hér að neðan.