Ásgerður Stefanía Baldursdóttir fyrrum leikmaður Vals og nú þjálfari hjá félaginu var gestur í Íþróttavikunni með Benna Bó á föstudagskvöld en með henni í setti var Hörður Snævar Jónsson, fréttastjóri íþrótta á Torgi.

Ásgerður ákvað á dögunum að leggja skóna á hilluna eftir magnaðan feril en hún lék á ferlinum 10 A-landsleiki. Hún hefur á undanförnum mánuðum slegið í gegn í sjónvarpi.

Adda var sérfræðingur í kringum Evrópumótið hjá körlum í fyrra og Evrópumót kvenna í ár. Þá hefur komið fram að hún verði á meðal sérfræðinga RÚV á HM í Katar.

„Þetta er skemmtilegt, mér finnst gaman að pæla dýpra í fótbolta en bara að horfa á hann,“ segir Adda eins og hún er alltaf kölluð.

„Það er gaman að vera í þessu teymi hjá RÚV, skemmtilegur hópur. Það er skemmtilegt að horfa á þetta.“

Komið hefur fram að Adda, Margrét Lára Viðarsdóttir, Heimir Hallgrímsson, Ólafur Kristjánsson og Arnar Gunnlaugsson verði sérfræðingar RÚV í kringum HM.

Umræðuna má horfa á hér að neðan.