Það eru margir kandídatar sem bíða þess að taka við forsetaembættinu í Rússlandi af Vladímír Pútín. Þetta er mat Kyrylo Budanov, yfirmanns leyniþjónustu úkraínska hersins.

Í viðtali við úkraínska Pravda skýrði hann frá hverjir berjast um að taka við af Pútín, að hans mati. Sky News skýrir frá þessu. Valdabarátta stendur yfir í Kreml og fór Budanov yfir hverjir eiga séns og hverjir geta gleymt því að komast í forsetastólinn.

Lengi hafa þeir Dmitry Medvedev, fyrrum forseti, og Dmitry Patrushev, sonur Nikolai Patrushev yfirmanns leyniþjónustunnar FSB, verið nefndir til sögunnar og sagðir berjast um að verða arftakar Pútíns. Budanov sagði að útilokað sé að Medvedev verði forseti á nýjan leik. „Medvedev á enga möguleika,“ sagði hann.

Hann sagði að Dmitry Patrushev eigi kannski fræðilegan möguleika en það sé aðallega faðir hans sem vilji að hann verði forseti.

Hann nefndi síðan Sergey Kiriyenko til sögunnar sem hugsanlegan kandídat í embættið. Hann er fyrrum yfirmaður rússnesku kjarnorkustofnunarinnar Rosatom, fyrrum forsætisráðherra og hefur annast innlimum Donbas í Rússland síðan stríðið hófst. „Kiriyenko sér sjálfan sig í stólnum. Hann sér sjálfan sig sem eftirmann þar sem valdaskiptin verða að meira eða minna leyti friðsamleg,“ sagði Budanov.