Foreldrar hennar fóru að hafa áhyggjur af henni þegar hún skilaði sér ekki heim úr skóla og tilkynntu um hvarf hennar til lögreglunnar. Klukkan 23 á föstudaginn fengu þau verstu hugsanlegu fréttirnar. Lola hafði fundist látin.
Heimilislaus maður fann lík hennar í ferðatösku í nítjánda hverfi borgarinnar. Taskan var í garðinum við fjölbýlishúsið sem Lola bjó í ásamt foreldrum sínum. The Guardian skýrir frá þessu.
Lögreglan segir að Lola hafi verið pyntuð, nauðgað og síðan kyrkt. Á líkama hennar fundust tölur, 0 og 1, sem voru gerðar með einhverskonar rafmagnstæki. Ekki er vitað af hverju þessar tölur voru skrifaðar á hana.
Le Parisien segir að fjórir hafi verið handteknir vegna málsins, þrír karlar og ein kona.
Enn er óljóst hvað gerðist nákvæmlega en lögreglan hefur upptökur úr eftirlitsmyndavél undir höndum sem gætu varpað ljósi á atburðarásina. Þær eru úr byggingu í hverfinu en þar var Lola um klukkan 15. En það á enn eftir að fylla upp í eyðurnar til klukkan 23.
Á upptökunni sést kona með Lola skömmu eftir að kennslu lauk þann daginn. Konan sást síðar um daginn með stóra plasttösku. Konan er í haldi lögreglunnar. The Guardian segir að hún glími við andleg veikindi.
