Lögreglan á Manchester-svæðinu segist engar nýjar upplýsingar hafa um málefni Gylfa Þórs Sigurðssonar. 455 dagar eru síðan hann var handtekinn, grunaður um kynferðisbrot gegn ólögráða einstaklingi.
Gylfi var handtekinn þann 16. júlí í fyrra. Varð hann skömmu síðar laus gegn tryggingu.
Fregna var að vænta af málinu nú í sumar, ári frá handtöku. Það hafa hins vegar engar nýjar upplýsingar fengist um málið síðan þá.
„Það eru engar nýjar upplýsingar,“ segir í svari Lögreglunnar í Greater Manchester við skriflegri fyrirspurn Fréttablaðsins.
Samningur Gylfa við Everton rann út í sumar. Hann hafði ekkert leikið með liðinu frá því málið kom upp.
Gylfi var um árabil landsliðsmaður Íslands. Hann hefur þó ekki heldur leikið fyrir hönd þjóðarinnar frá því málið sem um ræðir kom upp í fyrra.
