Jurgen Klopp, stjóri Liverpool, veit af hverju Arsenal náði að klófesta framherjann Gabriel Jesus í sumar frá Manchester City.

Ástæðan samkvæmt Klopp er sú að Man City hefur ekki áhyggjur af Arsenal í titilbaráttunni og taldi rétt í stöðunni að selja hann til Lundúna.

Það er eitthvað sem gæti komið í bakið á City en Arsenal hefur byrjað tímabilið frábærlega og með Jesus einmitt í fremstu víglínu.

Klopp telur að Englandsmeistararnir hefðu ekki selt Jesus til hvaða liðs sem er en Arsenal komst ekki í Evrópukeppni á síðustu leiktíð og var langt á eftir toppliðunum.

,,Ég þekki Gabriel ekki persónulega en mér hefur alltaf líkað við hann sem leikmann. Ég veit að City hefði ekki selt hann til hvaða liðs sem er en munurinn á þeim og Arsenal var það mikill að þeir gátu gert það,“ sagði Klopp.

,,Hann er framúrskarandi leikmaður og það sást hjá City. Gabriel Jesus spilaði sem nía og vængmaður, allir töldu að City væri nú þegar með níu en hann spilaði á vængnum og fær nú að spila sitt rétta hlutverk.“