Bandarískar leyniþjónustustofnanir telja að Úkraínumenn hafi staðið á bak við morðið á rússneska þjóðernissinnanum Darya Dugina í Moskvu þann 20. ágúst. Hún var ráðin af dögum með bílsprengju. Ekki er þó talið að hún hafi verið skotmarkið, það hafi verið faðir hennar Aleksandr Dugin sem er þekktur menntamaður og er sagður einn helsti hugmyndasmiður Vladímír Pútíns, forseta.

The New York Times skýrir frá þessu og vitnar í heimildarmenn í bandaríska utanríkisráðuneytinu. Blaðið segir að bandarískar leyniþjónustustofnanir telji að hluti af úkraínsku ríkisstjórninni hafi samþykkt tilræðið. Bandaríkin komu að sögn hvergi nálægt því.

Dugina var fréttamaður hjá rússneskri ríkissjónvarpsstöð og var velþekkt í Rússlandi. Hún studdi innrásina í Úkraínu af krafti.