Logi Tómasson, leikmaður Íslands og bikarmeistara Víkings, var gestur í sjónvarpsþætti 433.is á Hringbraut í gærkvöldi. Þar var farið yfir víðan völl og var þjálfari hans, Arnar Gunnlaugsson, meðal annars til umræðu.

Arnar tók við Víkingi árið 2018. Síðan þá hefur gengi liðsins verið hreint ótrúlegt. Liðið hefur orðið bikarmeistari 2019, 2021 og í ár, sem og Íslandsmeistari í fyrra.

„Maður er búinn að vera í Víkingi alla ævi og að Víkingur sér orðið félag sem á að vinna titla er smá súrealískt. Ég er búinn að alast upp og horfa á Víking ekki á góðum stað. Svo kemur Arnar og frá fyrsta árinu mínu í meistaraflokki vinnur maður titil á hverju ári,“ segir Logi í þættinum.

Hann var spurður út í það hvað hafi breyst með komu Arnars.

„Trúin á að við séum að fara að vinna leiki og hvernig við spilum fótbolta. Frá fyrsta degi var hann að láta okkur horfa á hvernig City og Liverpool eru að spila, en ekki einhvern önnur lið.“

Það hafa þó komið lægðir á mögnuðum tíma Arnars hjá Víkingum. Liðið hafnaði til að mynda í tíunda sæti tímabilið 2020, tímabilið eftir að liðið varð bikarmeistari. Arnar og hans menn voru þó trúir sinni nálgun og treystu vegferðinni.

„Fyrst var þetta basl. Við vorum að tapa leikjum en að reyna að spila okkar bolta. En núna höfum við verið að fullkomna það sem hann kom með og ég er mjög ánægður að hafa verið undir honum en ekki einhverjum öðrum,“ segir Logi.

„Gæinn er bara legend. Þetta er besti þjálfari sem ég hef haft. Ég er búinn að spila nokkrar stöður hjá honum og maður gæti í raun leyst hvaða stöðu sem er því maður kann kerfið inn og út. Hann er rosalegur þjálfari.“

Þáttinn í heild má sjá hér að neðan.