Hjörvar Hafliðason segir frá því í hlaðvarpsþætinum Dr. Football í dag að Vanda Sigurgeirsdóttir hafi átt í viðræðum við Heimi Hallgrímsson um að taka við íslenska karlalandsliðinu á nýjan leik.

Heimir þjálfaði landsliðið frá 2011 til 2018, fyrst sem aðstoðarþjálfari Lars Lagerback og svo aðalþjálfari. Hann er afar vinsæll á meðal þjóðarinnar og eflaust margir sem væru til í að sjá hann taka við á nýjan leik.

Arnar Þór Viðarsson er landsliðsþjálfari sem stendur. Hann hefur átt á brattann að sækja síðan frá því hann tók við árið 2020, þar sem hann hefur til að mynda ekki getað valið lykilmenn í landsliðið af utanaðkomandi ástæðum.

Ísland gerði 1-1 jafntefli við Albaníu í Þjóðadeildinni í gær, þar sem liðið sýndi mikinn karakter í að koma til baka í lok leiks eftir að hafa verið manni færri frá elleftu mínútu.

Arnar er með samning til ársins 2024. Þrátt fyrir að hafa rætt við Heimi virðist sem svo að Vanda hafi að lokum ákveðið að setja traust sitt á Arnar.

Heimir er nú tekinn við karlalandsliði Jamaíka. Liðið lék sinn fyrsta leik undir hans stjórn í gær, er það tapaði 3-0 gegn Argentínu.