Í gær birtist grein á ESPN um framtíð Cristiano Ronaldo hjá Manchester United, hvort félagið ætti að halda honum eða losa sig við hann og svo framvegis.
Þar kom meðal annars fram að fjöldi liðsfélaga hans hjá United væri búinn að fá upp í kok af Portúgalanum. Sagt er að hann geri óraunhæfar væntingar til þeirra og vilji að leikmenn eins og Harry Maguire og Marcus Rashford standi sig eins og Rio Ferdinand og Wayne Rooney gerðu á fyrri tíma Ronaldo hjá United.
Þá segir að mörgum liðsfélögum hans finnist hann orðinn „algjörlega óþolandi.“
Ronaldo sneri aftur til United fyrir ári síðan, eftir þriggja ára dvöl hjá Juventus. Hann skoraði 24 mörk í 38 leikjum á síðustu leiktíð. Hann hefur þó verið gagnrýndur fyrir hugarfar sitt og áhrif á aðra leikmenn.
Fyrr í sumar fór Ronaldo ekki með United í æfingaferð. Ástæðurnar sem hann gaf upp fyrir því voru persónulegar, en flestir telja að hann hafi verið að reyna að finna sér nýtt félag.
Félagaskiptaglugginn lokar annað kvöld og er framtíð portúgölsku stórstjörnunnar enn í óvissu.
