Casemiro, nýjasti leikmaður Manchester United, upplifði erfiða æsku en hann varð vitni að föður sínum yfirgefa fjölskylduna er hann var aðeins fimm ára gamall.

Eftir heiftarlegt rifrildi á heimilinu þá kvaddi faðir leikmannsins fyrir fullt og allt, og hafa þeir ekki séð hvor annan í 25 ár.

Casemiro segist þó ekki vera reiður eftir ákvörðun föður síns en viðurkennir að hann myndi ekki kannast við andlitið ef sú staða kæmi upp að þeir myndu hittast.

Casemiro hefur átt magnaðan feril sem knattspyrnumaður en hann lifði við mikla fátækt nálægt Sao Paulo í Brasilíu á yngri árum.

Í sumar var leikmaðurinn keyptur til Man Utd eftir mörg farsæl ár hjá stórliði Real Madrid.

,,Ef ég sé hann á götunni í dag þá mun ég ekki kannast við hann,“ sagði Casemiro.

,,Hann átti í harkalegu rifrildi við móður mína þegar ég var fimm ára gamall og hvarf í kjölfarið og mamma þurfti að sjá um okkur.“

,,Ég hef alltaf viljað hitta hann því ég er ekki bitur út í hann, þetta er það sem Guð vildi fyrir mig. Þess vegna hef ég aldrei gert neitt í málunum.“