Ómar Ingi Guðmundsson, þjálfari HK, var óánægður með dómgæsluna í kvöld er hans menn töpuðu 1-0 gegn Breiðabliki.

Um var að ræða leik í 8-liða úrslitum Mjólkurbikarsins en Omar Sowe gerði eina mark leiksins.

Ómar var stoltur af frammistöðu sinna manna en viðurkennir að það hafi verið sárt að tapa viðureigninni.

Ómar ræddi við RÚV eftir leik.

,,Ég er mjög stoltur af því sem þeir lögðu í leikinn en úrslitin svíða samt,“ sagði Ómar og var svo spurður út í markið sem HK skoraði í blálokin en var dæmt af vegna rangstöðu.

,,Það var mjög hröð tilfinningasveifla, ég bara stökk á fætur en svo strax sá ég flaggið á lofti og það slökknaði fljótt.“

Ómar vildi einnig fá mögulega tvær vítaspyrnur í leiknum og var ekki hrifinn af dómgæslunni.

,,Ég vildi fá víti í fyrri hálfleik þegar mér sýndist Elli henda tveimur mönnum niður í einu og þetta leit út fyrir að vera víti fyrir mér.“

,,Svo fannst mér Anton Ari keyra Oliver niður áður en hann náði í boltann, ég vildi fá víti í allavega annað af þessum skiptum.“