Haukar taka á móti Njarðvík í 2. deild karla í kvöld. Það verður þó ekki leikið á Ásvöllum, hefðbundnum heimavelli Hauka.
Það er verið að skipta um gervigras á Ásvöllum og því er ekki hægt að leika þar. Valsmenn lána Haukum því völlinn sinn í kvöld.
Þetta er ekki í fyrsta sinn sem Valur lánar karlaliði Hauka völlinn sinn. Það gerði félagið einnig þegar Hafnfirðingar léku í efstu deild sumarið 2010. Þá var stúkan á Ásvöllum ekki lögleg og ekki hægt að leika þar.
Haukar léku heimaleiki sína sumarið 2010 því alla á Hlíðarenda.
Njarðvík er á toppi deildarinnar með 40 stig. Liðið stefnir hraðbyri upp í Lengjudeildina, næstefstu deild.
Haukar eru í fimmta sæti með 24 stig, ellefu stigum á eftir Þrótti Reykjavík, sem er í öðru sæti. Haukar eiga leik til góða á Þrótt.