Cristiano Ronaldo segir að sannleikurinn um sumarið hans muni koma í ljós eftir tvær vikur, um það leyti sem félagaskiptaglugginn í flestum löndum Evrópu lokar.

Ronaldo hefur verið orðaður burt frá Manchester United í allt sumar. Portúgalinn vill spila í Meistaradeild Evrópu, eitthvað sem United getur ekki boðið honum eftir vonbrigði á síðustu leiktíð.

Ronaldo hefur verið orðaður við fjölda stórliða um allan heim en ekkert þeirra virðist til í að taka sénsinn á honum.

„Þau munu vita sannleikann þegar þau taka viðtal við mig eftir tvær vikur. Miðlarnir eru að ljúga. Aðeins fimm af þeim hundrað fréttum um mig síðasta mánuðinn hafa verið réttar. Ímyndið ykkur hvernig það er,“ skrifar Ronaldo á Instagram.

Portúgalinn fór ekki með United í æfingaferð liðsins til Asíu og Ástralíu fyrr í sumar. Ástæðurnar sem hann gaf upp var af fjölskyldulegum toga. Þó efast margir um það í ljósi stöðunnar.

Erik ten Hag, stjóri United, hefur verið harður á því að Ronaldo sé ekki til sölu í allt sumar. Samkvæmt fréttum að utan nú er hann þó við það að gefast upp á sóknarmanninum.

Þrátt fyrir það hefur Ronaldo spilað báða leiki United í ensku úrvalsdeildinni það sem af er tímabili. Hann kom inn á sem varamaður í 1-2 tapinu gegn Brighton og var í byrjunarliði í 4-0 tapinu gegn Brentford.