Joachim Andersen, miðvörður Crystal Palace, sýnir á Instagram-reikningi sínum frá virkilega ljótum skilaboðum sem hann fékk frá reiðum stuðningsmönnum Liverpool eftir leik liðanna í gær.
Leiknum lauk 1-1. Darwin Nunez fékk rautt spjald í seinni hálfleiknum fyrir að skalla Andersen. Daninn hafði gert í því að espa Nunez upp og að lokum fór Úrúgvæinn yfir strikið vegna pirrings.
Andersen segir frá ljótum skilaboðum sem hann fékk á Instagram. „Fékk 3-400 skilaboð af þessum toga í gærkvöldi. Ég skil að þið styðjið félag en sýnið smá virðingu og hættið að láta eins og þið séuð hörð í gegnum internetið,“ skrifar Andersen, áður en hann birtir nokkur skilaboð.
„Farðu til fjandans. Ég mun drepa þig og alla fjölskylduna þína,“ sagði einn notandi við Andersen. „Þú ert ömurlegur, harður maður sem dýfir sér. Ég vona að flugvélin hrapi á leið aftur til Lundúna,“ skrifaði annar.
Andersen segist vonast eftir því að úrvalsdeildin bregðist við þessu.
