Í gær fór fram fyrsti dagur réttarhalda yfir knattspyrnumanninum Benjamin Mendy. Frakkinn, sem er á mála hjá enska knattspyrnufélaginu Manchester City, er sakaður um átta nauðganir, eitt kynferðisbrot og eina tilraun til nauðgunar. Atvikin eiga að hafa átt sér stað frá október 2018 til ágúst 2021.
Hinn 28 ára gamli Mendy var handtekinn í ágúst í fyrra. Hann hefur verið laus gegn tryggingu frá því í janúar á þessu ári. Hann neitar alfarið sök.
Einnig er réttað yfir vini Mendy, Louis Saha Matturie. Sá er sakaður um átta nauðganir og fjögur kynferðisbrot. Alls eru þrettán konur sem tengjast brotum þeirra félaga.
Í gær fékk kviðdómur að heyra sögu frá kvöldi 23. júlí í fyrra, sem og aðfaranótt 24. júlí. Eru þetta mikilvægar dagsetningar í málinu.
Málið tengist sundlaugarteiti, ferð á skemmtistað og eftirteiti heima hjá Mendy. Á þessu kvöldi og nóttinni sem fylgdi í kjölfarið er Mendy sakaður um að nauðga þremur konum. Tvær þeirra voru 19 ára og ein 22 ára.
22 ára gamla konan vann á næturklúbbi í miðborg Manchester og borgaði Saha henni fyrir að koma í sundlaugarteitið. Mendy bauð henni i bíóherbergið á heimili sínu og hún fór með honum þangað. Konan sagði einni af þeim 19 ára gömlu að koma og ná í sig ef hún væri ekki komin aftur tíu mínútum síðar.
Hún vildi ekki stunda kynlíf með Mendy en hann krafðist þess og að lokum gaf hún undan. Hin stelpan kom og ætlaði að ná í hana en þá stóðu tveir menn fyrir hurðinni að bíóherberginu.
Eftir þetta var ferðinni heitið í miðborg Manchester á skemmtistað. Eftir það komu tvær kvennanna, þær sem voru 19 ára, aftur á heimili Mendy. Þar á þeim báðum að hafa verið nauðgað.
Önnur þeirra man aðeins eftir því að hafa verið í sundlauginni, en næsta augnablik sem hún man eftir er þegar hún sneri með andlitið niður á sófa og með hendur sínar bundnar fyrir aftan bak. Mendy var þá að nauðga henni og sagði henni að hreyfa sig ekki.
Fleiri frétta er að vænta af dómsmáli Benjamin Mendy og munum við fylgjast náið með gangi mála
