Cesar Azpilicueta hefur útskýrt af hverju hann endaði ekki hjá Barcelona í sumar eftir margar sögusagnir sem voru á kreiki.

Azpilicueta viðurkennir að Barcelona hafi sýnt sér áhuga og ræddi hann einnig við spænska félagið sem vildi mikið fá hann.

Chelsea var hins vegar ekki opið fyrir því að hleypa fyrirliða sínum burt og skrifaði hann að lokum undir nýjan samning við enska félagið.

,,Ég er alltaf hreinskilinn og samræðurnar áttu sér stað. Eftir að hafa unnið HM félagsliða þá var ég fyrsti leikmaður í sögu Chelsea til að vinna allt mögulegt. Þá hugsaði ég að það væri tími til að snúa aftur til Spánar í leit að nýrri áskorun,“ sagði Azpilicueta.

,,Í kjölfarið gerðust hlutir og ég átti mjög góðar samræður við stjórann og eigandann. Ég er fyrirliði liðsins og vildi vera trúr félaginu.“

,,Það sem var rætt er okkar á milli en við áttum gott spjall og ég áttaði mig á því að ég vildi halda áfram að hjálpa félaginu.“