Óskar Hrafn Þorvaldsson, þjálfari karlaliðs Breiðabliks, hefur undanfarið verið orðaður við þjálfarastöðuna hjá Norrköping.
Í gær var sagt frá því að hann væri einn af tveimur á blaði sem mögulegur þjálfari. Óskar var spurður út í þennan orðróm á fréttamannafundi á Kópavogsvelli fyrir Evrópuleik Blika gegn Istanbul Basaksehir annað kvöld.
„Þeir eru að endurvinna gamlar fréttir held ég, þetta eru sömu fréttir og fyrir tveimur vikum. Það er ekkert að frétta þar. Ég veit bara jafnmikið og þið um þetta,“ sagði Óskar léttur.
Hann var ekki til í að útiloka neitt alveg en sagði hug sinn hjá Breiðabliki.
„Það er ekkert hundrað prósent í lífinu. En eins og hugur minn er í dag er ég að þjálfa hjá Breiðabliki og ekkert annað.“