Beckham segir að stuðningsmenn Manchester United, sem hann lék fyrir á þessum tíma, sem og Sir Alex Ferguson, þá stjóra liðsins, hafi hjálpað sér mikið. ,,Ein mikilvægasta manneskjan á þessum tíma fyrir mig var Sir Alex Ferguson auk stuðningsmanna Manchester United. Ef það hefði ekki verið fyrir stuðningsmenn Manchester United á þessum tíma þá hefði það reynst mjög erfitt fyrir mig að komast yfir þetta atvik,“ segir Beckham.

Beckham var rekinn af velli í stöðunni 2-2 eftir að hafa brugðist illa við fíflalátum í Diego Simeone, þáverandi landsliðsmanni Argentínu. Leikurinn fór alla leið í vítaspyrnukeppni þar sem Englendingar töpuðu. ,,Ég vaknaði mjög snemma daginn eftir og framundan var flug til Bretlands sem ég var ekki mjög spenntur fyrir eftir að við féllum úr leik og miðað við það hvernig hann spilaðist fyrir mig. Ég vissi að það yrði erfitt fyrir mig að snúa aftur heim. Fljótlega eftir að ég vaknaði hringdi síminn minn og mín beið símtal úr númeri sem ég þekkti ekki. Ég ákvað að svara: ‘David, þetta er stjórinn’ var sagt hinum megin á línunni.“ Það var Ferguson sem hringdi.

,,Hann sagði við mig: ‘Taktu þér þriggja vikna frí, hvíldu þig og þegar að þú kemur til baka munum við taka vel á móti þér og hugsa um þig hér hjá Manchester United.’ Þetta var það sem kom mér í gegnum næsta tímabil eftir heimsmeistaramótið.“

Manchester United vann svo þrennuna á næsta tímabili eftir þetta.