Daily Mail segir að systurnar hafi flúið frá Sádi-Arabíu til Ástralíu, án fjölskyldu sinnar, 2017.
Claudia Allcroft, rannsóknarlögreglumaður, sagði að talið sé að þær hafi látist snemma í maí eða mánuði áður en rotnandi lík þeirra fundust. Ekki liggur fyrir hver dánarorsök þeirra var. Hún sagði að lögreglan vildi gjarnan heyra frá fólki sem hafi þekkt eitthvað til systranna eða vitað eitthvað um þær og líf þeirra.
Húsvörður í fjölbýlishúsinu, þar sem þær bjuggu, sem hafði samband við lögregluna um miðjan mars vegna matar sem hafði verið skilin eftir í sameigninni. Lögreglan kannaði þá með systurnar og var ekki annað að sjá en þær hefðu það gott og ekki þótti þörf á að grípa til neinna aðgerða.
En þann 7. júní fundust lík þeirra í íbúðinni og voru farin að rotna ansi mikið. Ástæðan fyrir að kannað var með systurnar var að þær höfðu ekki greitt húsaleigu í fjórar vikur og póstur hrúgaðist upp fyrir framan dyrnar hjá þeim.
Lögreglan segir að engir augljósir áverkar hafi verið á líkum þeirra og engin ummerki um að brotist hafi verið inn í íbúðina.
Eins og áður sagði flúðu þær til Ástralíu 2017, þegar þær voru 18 og 19 ára. Þær nutu aðstoðar yfirvalda í fimm ár og fengu aðstoð við að sækja um hæli. Þær voru að sögn ekki í reglulegu sambandi við ættingja sína í heimalandinu.
