Almar Möller, lögmaður Skúla Tómasar Gunnlaugssonar, fyrrverandi yfirlæknis á Heilbrigðisstofnunar Suðurnesja (HSS), sem sakaður hefur verið um að setja sjúklinga á lífslokameðferð án tilefnis, segist telja að í ljósi nýrra gagna verði mál gegn honum og öðrum lækni á HSS, felld niður.
Fréttablaðið greinir frá þessu.
Aðstandendur konu sem lést eftir lífslokameðferð á HSS haustið 2019 hafa kært Skúla til lögreglu fyrir manndráp af ásettu ráði. Annar læknir hefur einnig verið ásakaður um sambærileg brot.
Samkvæmt viðtali Fréttablaðsins við Almar var ekki alltaf samræmi milli skráningar í tölvukerfum og þeirra meðferða sem í raun hafi verið veittar. „Ég vænti þess að málin gegn mínum umbjóðanda verði nú felld niður í kjölfar niðurstöðu matsmannanna og að rannsókn verði hætt,“ segir Almar Möller við Fréttablaðið.
Dómkvaddir matsmenn hafa skilað af sér matsgerð um málið til Héraðsdóms Reykjaness. Rannsökuðu þeir meðferðir á sjúklingum í ljósi ásakana um stórfelld brot læknanna tveggja sem áttu að hafa falist í því að setja sjúlkinga í lífslokameðferð að óþörfu. Rannsókninni er ólokið.
Aðstandendur einnar konu sem lést eftir lífslokameðferð á HSS hafa margoft fullyrt að konan hafi ekki verið dauðvona en hún lagðist inn til hvíldarmeðferðar, ekki lífslokameðferðar.
