Kristján Óli Sigurðsson, sérfræðingur í hlaðvarpsþætti Þungavigtarinnar, var harðorður í garð íslenska kvennalandsliðsins í þætti sem birtist á fimmtudag.

Íslenska liðið er úr leik á EM eftir þrjú jafntefli í þremur leikjum en við náðum ekki að vinna leik gegn Belgum, Ítölum né Frökkum. Um leið varð Ísland það fyrsta í sögu EM kvenna til að detta úr leik án þesss að tapa leik.

Margir hafa hrósað frammistöðu landsliðsins á mótinu en Kristján segir að niðurstaðan sé ekkert nema döpur og í raun hræðileg.

Kristján nefnir að Belgar hafi komist upp úr þessum riðli en Belgía er með slakara lið en Ísland en tókst samt sem áður að komast í undanúrslit.

,,Af hverju? Af því við fórum ekki áfram og gátum ekkert í fyrstu tveimur leikjunum, ekki neitt. Við erum með fæstar sendingar á samherja í öllu mótinu,“ sagði Kristján í þættinum um af hverju niðurstaðan væri slæm.

,,Ég skil ekki alveg þetta hype að þetta hafi verið svo frábært og æðislegt og fullt af fólki sem hefur aldrei horft á fótboltaleik var á lyklaborðinu eins og það ætti bara engan morgundag eftir til að geta sagt eitt eða neitt um þessa frammistöðu. Þetta var bara dapurt mót í heildina, þjálfarinn fékk samning í fjögur ár í viðbót, þriðja júní var skrifað undir hann. Til hvers í andskotanum var verið að skrifa undir fjögurra ára samning við landsliðsþjálfara þegar hann er á leiðinni á stórmót og svo kemur hann heim með núll sigra gegn tveimur slökum liðum.“

,,Þriðja hver sending fór á mótherja. Svo voru bara allir að klappa, fólkið á RÚV það var bara stemning og ovation, ég veit ekki hvað og hvað og það verður væntanlega gert EM ævintýri, 18 þátta sería á RÚV í desember ef ég þekki mitt fólk rétt. Þetta var ömurleg niðurstaða. Belgar geta ekki neitt og fóru upp úr þessum riðli.“

Hér má heyra þáttinn í heild sinni þar sem Kristján fer nánar yfir málin.