Danijel Dejan Djuric er mættur í Víking Reykjavík en félagið staðfesti þetta nú rétt í þessu.
Hinn 19 ára gamli Danijel kemur frá Midtjylland í Danmörku.
Danijel ræddi við 433.is í Víkinni eftir að félagaskiptin voru staðfest.
„Mér líður mjög vel. Ég er mjög spenntur fyrir komandi tímum. Þetta verður mjög gaman,“ segir Danijel.
Hann var spurður út í það af hverju hann ákvað að koma heim til Íslands frá Midtjylland á þessum tímapunkti. „Pælingin er að spila fullorðinsfótbolta. Mér finnst ég geta fengið það allt hér í Víkingi.“
„Mig langar að vinna alla leiki. Persónulega vil ég sýna fólki, verða „household name“ eins og Kristall gerði.“
Önnur félög komu til greina fyrir Danijel og þar á meðal hans gamla félag, Breiðablik. „Það kom fullt af liðum til greina. Ég var búinn að æfa með Blikunum en mér leið bara miklu betur með Víking og leist miklu betur á Víking.“
