Serge Gnabry myndi henta liði Liverpool en það væri klikkun að fá inn annan sóknarsinnaðan leikmann fyrir næsta tímabil.

Þetta segir goðsögn Liverpool, Steve McMamanan, en Gnabry er mögulega á förum frá Bayern Munchen í sumar og hefur Liverpool verið nefnt til sögunnar.

Liverpool er nú þegar með frábæra sóknarlínu og má nefna leikmenn eins og Luis Diaz, Diogo Jota, Mo Salah og Roberto Firmino.

Gnabry býður Liverpool upp á eitthvað annað en þessir leikmenn að sögn McMamanan, eitthvað sem enska félagið gæti skoðað.

,,Ég tel að Liverpool gæti notað Serge Gnabry, hann býður upp á eitthvað öðruvísi, hann er með hraðann,“ sagði McManaman.

,,Hann hefur sannað það að hann er meiri vængmaður en Mo Salah því Mo vill koma inn á völlinn og nota vinstri fótinn. Gnabry er meira eins og gamaldags kantmaður.“

,,Ég held að þeir gætu notað hann en að vera með sex sóknarmenn væri klikkun. Stundum býður það upp á fleiri vandamál en þú þarft.“