Ísland vann góðan 1-3 sigur á Póllandi í fyrsta og eina æfingaleik liðsins fyrir Evrópumótið.
Íslenska liðið hefur oft spilað betur en heimakonur komust yfir í uppbótartíma fyrri hálfleiks.
Það var hins vegar Berglind Björg Þorvaldsdóttir sem jafnaði leikinn snemma í síðari hálfleik. Hún fékk sendingu frá Gunnhildi Yrsu Jónsdóttur og lagði boltann í netið af stuttu færi.
Skömmu síðar var það Sveindís Jane Jónsdóttir sem skoraði með þrumuskoti eftir að hafa leikið á varnarmann pólska liðsins.
Það var svo varamaðurinn Agla María Albertsdóttir sem bætti við þriðja markinu þegar rúmar fimm mínútur voru eftir af leiknum.
1-3 sigur Íslands staðreynd en liðið heldur nú til Þýskalands til æfinga áður en liðið fer til Englands þar sem mótið fer fram.