Portúgalski vinstri-bakvörðurinn Diogo Coelho hefur verið seldur frá Lengjudeildarliði Vestra til FK Suduva sem spilar í efstu deild í Litháen. Þetta staðfestir Gunnar Heiðar Þorvaldsson, þjálfari Vestra í samtali við 433.is.

Diogo gekk til liðs við Vestra árið 2020 og Gunnar Heiðar segir félagið hafa ákveðið að standa ekki í vegi fyrir leikmanninum þegar að þetta tækifæri stóð honum til boða. „Hann er að fara í félag sem tekur þátt í Evrópukeppni, eitt af toppliðinum í Litháen. Þetta er frábært tækifæri fyrir hann,” segir Gunnar Heiðar.

Vestri er því í leit að vinstri bakverði til þess að fylla upp í skarð Diogo. „Þetta sýnir okkur að það eru stærri félög út í heimi sem eru að fylgjast með leikmönnum Vestra og því sem við erum að gera. Virkilega jákvætt fyrir klúbbinn okkar. Við förum nú á fullt í það núna að finna arftakann og viljum helst fá Íslending sem er tilbúinn að koma vestur og halda áfram að þróa sig áfram sem knattspyrnumaður. Að njóta sumarsins á Ibizafirði er aldrei slæm hugmynd.“

Það hefur lifnað yfir liði Vestra undanfarið og er liðið í sjötta sæti Lengjudeildarinnar með tólf stig.