Knattspyrnukonan Megan Rapinoe gagnrýnir Alþjóða sundsambandið eftir að það bannaði transkonum að taka þátt í keppnum.
Sambandið tók ákvörðunina þar sem það þótti ekki sanngjarnt að fólk sem fer í gegnum kynþroskaskeið sem karlmenn fái að taka þátt í sundi kvenna.
Þátttaka transkvenna í sundi hefur verið mikið í umræðunni eftir að Lia Thomas varð fyrsta transkonan til að vinna landsmeistaratitil í bandarísku háskólaíþróttalífi í 500 metra skriðsundi.
„Ég styð það 100 prósent að transkonur fái að taka þátt,“ sagði Rapinoe.
Hún hélt áfram. „Fólk hefur heyrt mikið frá hægrinu því þar er fólk hávært. Þau halda áfram og gefast ekki upp.“
„Sýnið mér einhverjar sannanir á bakvið það að transkonur séu að taka skólastyrki allra annara, að þær séu yfirburðar í öllum íþróttum, séu að vinna allt. Fyrirgefið en það er bara ekki þannig.“
„Við getum komist að niðurstöðu í þessu en við getum ekki byrjað á því að vera á móti þessu. Það er ljótt og í raun ógeðslegt.“
„Við þurfum að taka skref til baka og ná tökum á því sem við erum í raun að fást við því líf fólks er í húfi. Líf barna er í húfi vegna sjálfsvíga, þunglyndis og eiturlyfjanotkunar. “
