Ómar Smárason, deildastjóri samskiptadeildar Knattspyrnusambands Íslands, sagði í samtali við Fréttablaðið í gær að sögusagnir um að Coca-Cola, einn af aðalstyrktaraðilum sambandsins, hafi bannað fundi á milli Tólfunnar og landsiðsþjálfara Íslands á Ölver þar sem staðurinn er með samning við Ölgerðina ekki á rökum reistar.
Það tíðkaðist í tíð Lars Lagerback, Heimis Hallgrímssonar og Erik Hamren að einn landsliðsþjálfaranna mættu á Ölver og ræddu við Tólfuna, stuðningsmannasveit Íslands, og aðra stuðningsmenn fyrir leik, fóru yfir uppleggið og fleira.
Það hefur þó ekki verið gert í tíð Arnars Þórs Viðarssonar, núverandi landsliðsþjálfara. Fyrst um sinn var það auðvitað ekki mögulegt vegna kórónuveirunnar en nú eru allar samkomutakmarkanir úr gildi.
„Það er bara algjör steypa. Það hefur ekkert slíkt komið upp. Þetta var eitthvað sem Heimir gerði á sínum tíma, Freyr hélt þessu síðan áfram þegar að hann starfaði með Hamrén og það er bara undir hverju teymi komið að ákveða þetta. En ég get alveg staðfest það að þessar sögusagnir eru ekki á rökum reistar,“ sagði Ómar við Fréttablaðið.
