Hjörvar Hafliðson telur að íslenska karlalandsliðið væri komið langt með að vinna riðil sinn í Þjóðadeildinni ef miðjumaðurinn Guðlaugur Victor Pálsson hefði verið með liðinu í þessum landsleikjaglugga.
Ísland er með þrjú stig í riðlinum eftir að hafa gert tvö jafntefli við Ísrael og eitt við Albaníu. Liðið er tveimur stigum á eftir Ísrael og þarf því að treysta á að þeir tapi gegn Albönum í haust og sömuleiðis að Ísland vinni sinn leik gegn Albönum ef sigur í riðlinum og sæti í umspili um sæti á EM 2024 á að nást.
„Ég held að við værum komnir langleiðina upp úr þessum riðli ef Gulli Victor væri með okkur. Ef við værum með þetta energy sem hann hafði í þessum landsleikjum undir Hamren þá værum við komnir áfram,“ sagði Hjörvar í hlaðvarpsþætti sínum, Dr. Football.
Guðlaugur Victor hefur ekki gefið kost á sér í landsliðið undanfarið þar sem hann notar landsleikjahlé til að hitta son sinn sem býr í öðru landi.
Hjörvar segir einnig að Birkir Bjarnason hafi ekki lengur það sem til þarf til að spila djúpur á miðjunni. „Birkir Bjarnason er ekkert sexa, þetta er ekkert staðan fyrir hann. Hann hefur ekki lappirnar í þetta lengur. Það vantar tilfinnanlega mann í þessa stöðu.“