Breiðablik telur að betur hefði mátt standa að samskiptum þegar A-landslið karla valdi þrjá leikmenn Breiðabliks í verkefni gegn San Marínó í gær. Frá þessu var sagt í hlaðvarpsþættinum Þugnavigtin og Ólafur Kristjánsson yfirmaður knattspyrnumála hjá Breiðablik staðfestir svo við 433.is.

Þeir Jason Daði Svanþórsson, Damir Muminovic og Höskuldur Gunnlaugsson voru allir valdir í A-landsliðið fyrir æfingaleikinn í gær. Allir þrír komu inn sem varamenn. Ísland vann þar 1-0 sigur.

„Það var haft samband við leikmenn sem voru valdir í þennan hóp úr Bestu deildinni 23:45 á mánudagskvöldið. Það var tekið samtal, Breiðablik var ekki látið vita. Það er slíkur amatörismi í Laugardalnum að það var ekki haft sambandið við félagið,“ sagði Kristján Óli Sigurðsson í Þungavigtinni.

Ólafur Kristjánsson segir í samtali við 433.is að samskipti hafi átt sér stað en standa hefði mátt betur að málum. „Það var hringt í Óskar (þjálfara Breiðabliks) seint á mánudagskvöldið, hvort það væri ekki í lagi að þeir færu út. Hann sagði að það væri allt í lagi, það sem vantaði inn í jöfnuna var að senda póst á mig eða Eystein (Framkvæmdarstjóra) að þeir færu út á þriðjudegi og kæmu heim á föstudegi. Ég sendi á Klöru (Framkvæmdarstjóra KSÍ) að það væri eðlilegt að senda á klúbbinn líka. Það er búið að klára þetta mál,“ sagði Ólafur.

Kristján Óli heldur því fram í þætti sínum að einum leikmanni Breiðabliks hafi verið lofað að hann myndi byrja leikinn af Arnari Viðarssyni landsliðsþjálfara. „Einn af þessum leikmönnum í Breiðablik þurfti að meta hvort hann ætti að gefa kost á sér í verkefnið. Hann tók samtalið við Arnar, hann lofaði honum að hann myndi byrja leikinn. Þess vegna væri hann að taka hann með út, sá spilaði fjórar eða fimm mínútur.“