Kári Árnason var sérfræðingur í myndveri hjá Viaplay eftir 1-0 sigur Íslands á San Marínó í æfingaleik í gær. Liðið og Arnar Þór Viðarsson hafa fengið skammir í hattinn fyrir frammistöðuna.
Undir lok þáttarins vildi Kári aðeins létta af sér og tala um hluti sem hann hefur tekið eftir á æfingum liðsins undir stjórn Arnars.
„Ég er búin að sjá klippur af æfingum, þetta er serious buisness. Það brunnu allir heitar fyrir landsliðið en félagsliðið hjá okkur,“ sagði Kári en hann og Rúrik Gíslason voru sérfræðingar í setti.
„Það vill þannig til að það er gaman að spila fótbolta. Þetta eiga að vera keppnismenn, það sem ég er að sjá af æfingum að þá eru þetta fíflalæti. Ég þoldi ekki svona, einhverjir leikir. Köttur og mús eða eltingaleikur, hvað er næst? Dimmalimm,“ sagði Kári og var ekki skemmt.
„Það er gaman í fótbolta, mér finnst ekki lengur gaman í dimmalimm. Það fór í taugarnar á mér og mig langaði að segja það.“
