Johnny Depp hefur lengi verið ein af skærustu stjörnum Hollywood. Og þótt að hans fyrrverandi eiginkona og núverandi erkióvinur, Amber Heard, hafi verið minna þekkt en Depp, getur enginn neitað að hana mátti með réttu kalla stjörnu.
En flestir eru þó á því að hin sanna stórstjarna í málaferlum skötuhjúanna sé lögfræðingur Depp: Camille Vasquez.
Vilja margir eigna henni að stórum hluta sigur Depp sem var úrskurðað 10 milljónir í skaðabætur í meiðyrðamáli hans gegn Heard. Eftir því sem leið á réttarhöldin birtu sífellt fleiri myndir af sér á samfélagsmiðlum í bolum merktum „Ég hjarta Camille Vasques“ og einn aðdáandi lét meira að segja húðflúra andlit hennar á sig. 
Kom inn á síðustu stundu
Myllumerkið #camillevasquez hefur fengið rúmlega 1,4 milljarða í áhorf á TikTok og eru þá ekki talin með tugir annarra helgaðir henni, jafnvel er til #camillevasquezoutfits. Tveggja mínútna myndbandsbrot af lögfræðingnum svo að segja kæfa vitnisburð Heard með andmælum hefur hlotið 27 milljón áhorf og sín eigin myllumerki, #objection og #objections.
Og talandi um myllumerki: Myndbönd merkt #JusticeforJohnny hafa hlotið 19 milljarða áhorf á móti aðeins 81 milljónum á þau merkt #JusticeforAmberHeard.
Camille Vasquez er þó aðeins ein af níu sem mynduðu lögfræðiteymi Depp og var ekki einu sinni fyrsta val sem aðallögfræðingur þótt að í upphafi hafi verið tekin sú ákvörðun að hafa konu í forsvari. Fysta val var þrautreyndur lögfræðingur að nafni Kathleen Zellner sem er hvað þekktust fyrir framgöngu sína í málinu sem sjónvarpsþættirnir Making a Murderer, og eru Íslendingum að góðu kunnir.
Á síðustu stundu var aftur á móti ákveðið að láta starfann í hendur Vasquez.
Ástarsambandið kjaftasaga
Það er ákvörðun sem Depp sér vafalaust ekki eftir. Þegar að Vasquez hóf yfirheyrslur yfir Heard skapaði hún sér á örskotsstund heimsfrægð fyrir fagmennsku, orðheppni og yfirvegaða framkomu. Hún mun einnig hafa vakið gríðarlega virðingu, jafnt meðal lögfræðinga sem að málinu komu, kviðdóms og jafnvel dómara. Hún þykir enn fremur hafa haft hlýju til að bera og augljósa umhyggju fyrir Depp, sem á tímabili kom af stað orðrómi um að samband þeirra væri hugsanlega dýpra en á milli skjólstæðings og lögfræðings.
Sá orðrómur var þó skotinn í kaf og hefur faðir Vasquez, Leonel Vasquez, staðfest að dóttir hans sé í föstu sambandi við annan lögfræðing sem þó hefur ekki verið nafngreindur.
Lof og last
Camille Vasquez er 37 ára gömul, þrautreyndur lögfræðingur af kólumbískum og kúbverskum ættum. Framganga hennar þykir sigur fyrir konur af latneskum uppruna, og reyndar allar konur, enda ekki á hverju degi sem lögfræðingur er dáð af unglingsstúlkum í stað leikkvenna, fyrirsætna eða samfélagsmiðlastjarna. Þó hafa heyrst raddir sem átelja Vasquez fyrir að verja karlmann sem sakaður var fyrir ofbeldi gegn konu, og að jafnvel með framgöngu sinni gegn Heard í vitnastúku hafi Vasquez, ein og sér, fært kvenréttindabaráttuna hálfa öld aftur í tímann.
En þær raddir hafa að mestu drukknað í röddum mun stærri hóps aðdáenda.
Talið er að réttarhöldin, og ekki síst framganga Vasquez, munu verða til þess að metaðsókn verði í laganám á næstunni, ekki síst meðal ungra kvenna.
Framtíð þremenninganna
Hvað varðar framtíð þremenninganna sem léku aðalhlutverkin í réttarhöldunum er ljóst að Depp hefur hlotið uppreist æru og sér hugsanlega fram á meiri vinsældir en nokkru sinni fyrr. Hlýtur Disney kvikmyndaverið að naga sig í hnúana fyrir að segja honum upp störfum sem Jack Sparrow í Pirates of the Caribeean kvikmyndunum sem hafa mokað inn fé fyrir Disney. 
Amber Heard á að öllum líkindum ekki eftir að starfa sem leikkona í Hollywood, slíkur hefur skaðinn á mannorði hennar orðið. Heard sér einnig fram á gjaldþrot en eigur hennar mælast aðeins um fjórðungur af þeim skaðabótum sem henni voru dæmdar að greiða Depp.
Camille Vasquez þarf aftur á móti ekki að hafa áhyggjur af atvinnuleysi á næstunni. Hún er stjarna.
