Átta umferðir eru búnar í Bestu deild karla og línur eru farnar að skýrast, þrjú félög upplifa mikil vonbrigði og stjórnarmenn þeirra félaga gætu á næstu dögum skoðað stöðu þjálfarans.
Valur hefur tapað fjórum leikjum í röð undir stjórn Heimis Guðjónssonar, liðið er úr leik í bikarnum og er ellefu stigum á eftir toppliði Breiðabliks.
Valur endaði síðasta tímabil á slæman hátt og byrjunin á þessu tímabili setur alla pressuna á Heimi Guðjónsson. Heimir fékk traustið frá stjórn Vals síðasta haust.
Búist er við að stjórnarmenn Vals fundi um stöðuna í vikunni en formaður knattspyrnudeildar, Börkur Edvardsson er væntanlegur til landsins. Sá möguleiki hefur verið nefndur að aðstoðarþjálfarinn, Helgi Sigurðsson taki við liðinu.
Heimir Hallgrímsson og Eiður Smári Guðjohnsen eru einnig orðaðir við starfið en fleiri félög gætu horft í þessa risa í íslenskri knattspyrnusögu.
Heimir hefur verið án starfs í heilt ár eftir að hann lét af störfum hjá Al-Arabi í Katar, hann hefur verið orðaður við mörg lið en engu landað. Eiður Smári hætti sem aðstoðarþjálfari landsliðsins undir lok seinasta ár, hann gerði góða hluti með FH fyrir tæpum tveimur árum.
Ólafur Jóhannesson, lærifaðir Heimis er í krísu með FH eftir átta umferðir. Liðið situr í níunda sæti deildarinnar og er aðeins með átta stig. FH hefur bara unnið tvo deildarleiki, þeir sigrar komu gegn nýliðum Fram og ÍBV á heimavelli.
Ólafur tók við FH á erfiðum stað síðasta sumar og tókst að snúa aðeins við gengi liðsins, væntingarnar fyrir mótið voru að FH væri með lið til að berjast á toppnum.
Harla ólíklegt er að FH reki Ólaf úr starfi en ekki er óhugsandi að Ólafur hreinlega segi upp störfum og hleypi öðrum manni að.
Eyjamenn komu upp í Bestu deildina með vonir og væntingar í brjósti en eftir átta umferðir hefur liðið ekki unnið leik. Hermann Hreiðarsson tók við þjálfun liðsins í vetur en liðið hefur aðeins skorað sex mörk í upphafi móts.
ÍBV liðið er þokkalega vel mannað en áflog Hermanns við Guðjón Pétur Lýðsson á dögunum lýsa ástandinu í liðinu ágætlega.
Guðjón situr nú í kuldanum og er í agabanni á meðan Hermann reynir að finna lausnir. Fari ÍBV ekki að vinna leiki mun stjórn ÍBV vafalítið skoða stöðuna.
Frí er í deildinni næstu tvær vikurnar á meðan landsleikir fara fram en um er að ræða vinsælan tíma til þess að skipta um þjálfara ef illa gengur.