Argentíski framherjinn Julian Alvarez skoraði sex mörk í 8-1 sigri River Plate á Alianza Lima í Suður-Ameríkukeppni félagsliða í gær.

Alvarez hefur skorað 15 mörk í 19 leikjum fyrir River Plate á þessari leiktíð og er talinn einn efnilegasti framherji heims, ásamt Erling Braut Haaland. Alvarez samdi við Englandsmeistara Manchester City í janúar en verður áfram hjá River Plate þangað til í sumar.

Ljóst er að Haaland og Alvarez munu berjast um byrjunarliðssæti hjá City á næstu leiktíð. City hóf síðustu leiktíð án hefðbundins framherja innan sinna raða en tókst samt sem áður að hreppa fjórða meistaratitil félagsins á fimm árum.

City mun að öllum líkindum berjast um alla þá titla sem í boði eru á næstu leiktíð og spurning hvort Alvarez og Haaland takist loks að hjálpa liðinu að vinna fyrsta Meistaradeildartitilinn í sögu félagsins.