Í tæpt ár hafa flestir reyndustu leikmenn íslenska landsliðsins ekki verið með. Ástæðurnar eru misjafnar en ljóst er að með hverju verkefninu er ólíklegt að menn snúi aftur.

Arnar Þór Viðarsson valdi í dag nýjan landsliðshóp og þar er sama sagan og síðustu mánuði. Landsliðsþjálfairnn útilokar þó ekki endurkomur og heldur í vonina.

„Við höfum alltaf sagt að við viljum alla leiki, ég sem þjálfari vill alltaf velja besta liðið sem er í boði. Svo lengi sem leikmenn sem eru meiddir eða gefa ekki kost á sér segja ekki að þeir séu hættir þá vona ég að þeir á betri stað í næsta gluggi og ég geti valið úr fleiri leikmönnum. ÉG vona að þeir komi aftur ef þeir segjast ekki vera hættir, það er fullt af eldri leikmönnum núna sem gefa ekki kost á sér og það eru mismunandi ástæður. Hvort sem menn eru meiddir eða persónulegt,“ segir Arnar

Meira:
Arnar opinberar nýjan landsliðshóp: Hákon Arnar fær tækifæri – Aron Einar ekki í hóp

Hann sagðist hafa rætt við Jón Daða Böðvarsson sem gaf ekki kost á sér, hann hefur í tæpan mánuð verið í fríi og er að mæta til æfinga hjá Bolton um miðjan mánuðinn.

Arnar sagðist hafa rætt við Alfreð Finnbogason og Jóhann Berg Guðmundsson. „Jói er að koma til baka eftir meiðsli og er að byrja að æfa út á velli. Alfreð er kominn aðeins lengra en hann vill ná sér að fullu. Alfreð er að renna út af samningi og þá er alltaf spurning hvort leikmaður sé að taka þá áhættu að spila landsleik og meiðast. Miðað við meiðslasögu Alfreðs þá skilur maður þetta. Vonandi getum við valið hann í næsta glugga.“

Guðlaugur Victor Pálsson gaf ekki kost á sér í þetta verkefni af persónulegum fjölskyldu ástæðum að sögn Arnars.