Leik Kristiansund og Tromsö í norsku úrvalsdeildinni sem átti að fara fram á morgun hefur verið frestað vegna mikilla veikinda í leikmannahópi Kristiansund. Þetta kemur fram í tilkynningu frá Kristiansund en Brynjólfur Darri Willumsson leikur með liðinu.

,,Við vorum svo tilbúnir fyrir leikinn, stemmninguna og þrjú stig á Kristiansund vellinum en sökum veikinda í leikmannahópnum er ómögulegt fyrir okkur að mæta til leiks,“ segir í tilkynningu frá Kristiansund en aðeins þrír leikmenn leikmannahópsins eru leikfærir eins og staðan er núna.

Kristiansund sótti um frestun til norska knattspyrnusambandsins og gefið var leyfi fyrir því að fresta leiknum.

,,Það hefði ekki verið réttlætanlegt að spila leikinn þegar meiðsli og veikindi í leikmannahópnum eru tekin með í reikninginn,“ segir í tilkynningu frá Kristiansund.

Brynjólfur Darri gekk til liðs við Kristiansund frá Breiðablik í mars á síðasta ári. Síðan þá hefur hann leikið 29 leiki fyrir félagið, skorað þrjú mörk og gefið fjórar stoðsendingar.