Þegar John Pennington vaknaði upp af sex mánaða dái 2015 hélt hann að hann þyrfti að fara að mæta í vinnu. En honum brá mikið þegar hann áttaði sig á að hann lá í rúmi á sjúkrastofu. Handleggir hans og fætur voru fastspenntir. Hjúkrunarfræðingur var inni á stofunni þegar hann vaknaði og hann kallaði á hana og spurði hvort hann mætti fara á klósettið. Henni brá svo mikið að hún hljóp grátandi út.

Þetta kemur fram í viðtali við hann í Mel Magazine. Hann sagðist hafa talið að hann hlyti að hafa drepið einhvern fyrst hann var ólaður fastur við rúmið. En svo var ekki. Hann hafði hlotið alvarlega heilaáverka og taldi taugasérfræðingur að ef svo ólíklega færi að hann kæmist til meðvitundar myndi ekki geta gert mikið. En sem betur fer hafði hann rangt fyrir sér.

Hjúkrunarfræðingur kom aftur eftir nokkrar mínútur og sagðist hafa þurft að jafna sig aðeins því Pennington hefði verið í dái í sex mánuði.

Pennington sat nýlega fyrir svörum um málið á samfélagsmiðlinum Reddit. Þar sagði hann að það hafi verið mikið áfall að vakna upp á sjúkrahúsinu en það hafi ekki verið mesta áfallið því það var þegar honum var sagt að faðir hans hefði tekið eigið líf á meðan hann var í dái. „Að missa föður minn var það erfiðasta. Ég held enn upp á afmælið hans og kaupi köku handa honum,“ sagði hann meðal annars.

Hann sagði að margt hafi bjátað á hjá fjölskyldu hans á þessum tíma. Hann hafi verið í dái, systir hans hafi glímt við eiturlyfjafíkn og faðir þeirra hafi reynt að aðstoða hana við að greiða húsaleiguna.