Manchester City er komið með þriggja stiga forskot á Liverpool á toppi ensku úrvalsdeildarinnar eftir að hafa rúllað yfir Newcastle á heimavelli í dag.

Raheem Sterling kom City yfir eftir tæpar 20 mínútur. Aymeric Laporte bætti svo við marki á 38. mínútu og staðan í hálfleik var 2-0.

Rodri gulltryggði sigur heimamanna með marki á 61. mínútu.

Englandsmeistararnir bættu svo við tveimur mörkum í blálokin. Phil Foden skoraði fjórða markið á 90. mínútu áður en Sterling skoraði sitt annað mark í uppbótartíma. Lokatölur 5-0.

Sem fyrr segir er City á toppi deildarinnar, nú með 86 stig. Ásamt því að vera með þremur stigum meira en Liverpool er markatala liðsins nú fjórum mörkum betri en hjá lærisveinum Jurgen Klopp eftir stórsigurinn í dag.

Newcastle er í þrettánda sæti með 43 stig.