Rætt var um Mino Raiola, umboðsmanninn ótrúlega, í íþróttavikunni með Benna Bó sem er á dagskrá Hringbrautar alla föstudaga klukkan 21. Pálmi Rafna Pálmason, fyrirliði KR, sat í settinu með Herði Snævari Jónssyni, íþróttastjóra Torgs en í vikunni var það tilkkynnt af virtum blaðamönnum út í heimi að Raiola væri allur. Slíkt átti ekki við rök að styðjast og Raiola tilkynnti sjálfur á Twitter að hann væri enn á lífi.

„Ég hef á löngum ferli farið út með einhverjar fréttir sem eru kannski á mörkunum en ég myndi halda að þegar farið er með fréttir af lífi eða dauða fólks þá sé sú frétt ekki sögð nema hún sé 170 prósent rétt. Þetta var ótrúlegur farsi,“ sagði Hörður.

Pálmi, fékk einmitt fréttirnar af andlátinu frá þáttastjórnandanum á bikardrættinum sem fram fór á fimmtudag. „Ég var mjög hissa þegar ég heyrði þetta og eiginlega enn meira hissa þegar hann var tilkynntur á lífi. Eins og Höddi bendir á – að koma með svona frétt án þess að það sé staðfest er með ólíkindum.“