Samkvæmt heimildum Smartlands er íslenski ríkisborgarinn sem handtekinn var á Spáni í síðasta mánuði áhrifavaldurinn Kristján Einar Sigurbjörnsson. Ekki er vitað nákvæmlega hvers vegna Kristján, sem iðulega er kallaður Kleini, var handtekinn.
Sveinn H. Guðmarsson, fjölmiðlafulltrúi utanríkisráðuneytisins, staðfesti í samtali við Smartland fyrr í dag að leitað hafði verið til borgaraþjónustu ráðuneytisins vegna handtökunnar.
Kristján trúlofaðist söngkonunni Svölu Björgvins árið 2020 en frægðarstjarna Kristjáns fór á flug þegar samband þeirra hófst. „Það er enginn vafi á því að ég mun aldrei elska neina eins og ég elska Svölu. Í henni hitti ég sálufélaga minn og ég trúi því að ef maður er heppinn, þá gerist slíkt bara einu sinni á lífsleiðinni,“ sagði hann í viðtali við Fréttablaðið í fyrra.
Þetta er ekki í fyrsta skipti sem Kristján kemst í kast við lögin. Hann var í fyrra sakfelldur fyrir fíkniefna- og vopnalagabrot. Hann var einnig sakfelldur fyrir líkamsárás í héraðsdómi en sýknaður í Landsrétti.
Í desember árið 2020 greindi DV frá því að héraðssaksóknari væri búinn að ákæra Kristján fyrir að hóta lögreglumönnum lífláti á Hótel Barón við Barónsstíg í Reykjavík. Samkvæmt ákærunni á Kristján að hafa sagt eftirfarandi við þrjá lögreglumenn er þeir voru við skyldustörf: „Einn daginn mun ég drepa einn af ykkur.“
Er athæfi Kristjáns sagt varða við 106. gr. almennra hegningarlaga sem fjallar um brot gegn valdstjórninni. Samkvæmt bestu vitund DV er enn ekki búið að dæma í því máli en Kristján hefur áður gerst brotlegur við ákvæðið sem um ræðir.
