Poppstjarnan Britney Spears er ólétt. Þetta er þriðja barn hennar en fyrsta barn hennar og unnusta hennar, Sam Asghari.
Söngkonan, 40 ára, kom aðdáendum sínum rækilega á óvart þegar hún tilkynnti að hún væri ólétt í færslu á Instagram. Britney hefur verið iðin við að birta mikið af efni á samfélagsmiðlum og voru netverjar ekki vissir hvort þetta væri alvöru tilkynning eða ekki.
Sam, 28 ára, staðfesti að hún væri ólétt á Instagram og birti mynd af ljóni, ljónynju og hvolpinum þeirra.
„Hjónaband og börn eru eðlilegur hluti af sterku sambandi sem er fullt af ást og virðingu. Að vera faðir er eitthvað sem ég hef alltaf hlakkað til og ekki eitthvað sem ég tek sem sjálfsögðum hlut. Þetta er það mikilvægasta sem ég mun nokkurn tíma gera,“ skrifaði hann með myndinni.
Fyrr um daginn deildi Britney mynd af kaffibolla og blómum. „Ég léttist svo mikið áður en ég fór til Maui og ég hef bætt því öllu aftur á mig. Ég hugsaði: „Dísess, hvað gerðist fyrir magann minn???“ Eiginmaður minn sagði: „Þú ert ólétt af mat kjáni!!“ Þannig ég tók óléttupróf og öööö… ég er að fara að eignast barn.“
Britney sagði að hún myndi „missa það“ ef það væru tvö börn „þarna inni.“ Hún opnaði sig einnig um meðgönguþunglyndi sem hún glímdi við á fyrri meðgöngum.
Aðdáendur stjörnunnar eru hamingjusamir fyrir hennar hönd og óska henni alls hins besta.
Britney á fyrir tvö börn með fyrrverandi eiginmanni sínum Kevin Federline, drengina Sean og James Federline. Hún hefur verið með unnusta sínum Sam í sex ár og trúlofuðust þau í fyrra.
