Knattspyrnusamband Íslands, boðaði til blaðamannafundar í dag þar sem að tveir nýjir starfsmenn sambandsins, Jóhannes Karl Guðjónsson, aðstoðarþjálfari íslenska karlalandsliðsins og Grétar Rafn Steinsson, tæknilegur ráðgjafi, sátu fyrir svörum ásamt Arnari Þór Viðarssyni, landsliðsþjálfara og Vöndu Sigurgeirsdóttur, formanni KSÍ

,,Ég er mjög ánægður og stoltur að KSÍ hafi náð að næla í þessa tvo. Ég er alveg öruggur á því að eftir öll mín samtöl við þá báða þá eru þetta tvier aðilar sem við þurfum á að halda í okkar vegferð hér hjá KSÍ. Þeir tikka í öll þau box sem við vorum búin að teikna upp,“ sagði Arnar Þór um ráðningu tvíeykisins.

Hann er ánægður með að Jói Kalli hafi tekið skrefið frá ÍA til KSÍ.

,,Við erum teymi og vinnum saman. Mest ánægður með að hann er ekki aðstoðarþjálfari hann er aðalþjálfari sem hefur verið að leggja hart að sér í þjálfun á Íslandi undanfarin ár og hefur mikla reynslu úr atvinnumennsku. Það var rosalega mikilvægt fyrir mig að fá sterkan aðila mér við hlið. Ég er ekki að leita eftir einhverjum sem segir alltaf já.“

Jói Kalli segir þetta skref vera gríðarlegan heiður fyrir sig.

,,Fyrir mig er þetta gríðarlegur heiður að fá að taka þátt í þessar uppbyggingu. Ég er spenntur fyrir því að fá að vera hluti af þessu. Það hafa ákeðin umskipti átt sér stað en a sama tíma eru gríðarlega spennandi tímar framundan.“

,,Þetta er frábært fyrir mig sem einstakling að fá að vinna með Arnari og Grétari. Ég hef líka trú á því að ég geti lagt mitt af mörkum til að byggja upp skemmtilegt og gott landslið,“ sagði Jóhannes Karl Guðjónsson, aðstoðarlandsliðsþjálfari íslenska karlalandsliðsins í knattspyrnu.

Vanda Sigurgeirsdóttir, formaður KSÍ var að vonum ánægð með ráðninguna á Jóhannesi Karli.

,,Jóhannes Karl er ekki bara að fara að nýtast í A-landsliði karla heldur líka á knattspyrnusviðinu sjálfu. Það gerir þessa ráðningu enn betri.

Hún segir viðræðurnar við ÍA hafa gengið vel þó svo að ekki væri um óskastöðu að ræða fyrir félagið.

,,Þetta er ekki auðvelt á þessum tíma. Að sjálfsögðu voru þetta ekki bestu fréttirnar fyrir ÍA. Þetta gekk fínt. En ef ég set mig í þeirra spor er það ekki óskastaða að vera ekki með þjálfara rúmum tveimur mánuðum fyrir mót.“

Jói sagði allt hafa verið gert eftir bókinni. ,,ÍA vill standa fyrir það að hjálpa sínum leikmönnum og þjálfurum í að ná lengra. Mér finnst þetta vera næsta skref fyrir mig á ferlinum. Ég kveð Skagann með söknuðu en þessi tímapunktur kemur bara núna og því samstarfi er bara lokið. Ég held að allir séu eins sáttir með niðurstöðuna og hægt er að vera.“