Bakvörðurinn Hörður Ingi Gunnarsson hefur skrifað undir þriggja ára samning við norska knattspyrnufélagið Sogndal sem spilar í næst efstu deild Noregs. Þetta kemur fram í tilkynningu frá Sogndal.

Hörður gengur til liðs við Sogndal frá FH en hann spilaði 21 leik með Hafnarfjarðarliðinu á síðasta tímabili.

Hörður hefur einnig leikið með yngri landsliðum Íslands og á einnig að baki einn A-landsleik.

Auk FH hefur Hörður einnig spilað með ÍA, Víkingi Ólafsvík og HK hér á landi.

Hann segist vera ánægður með að vera genginn til liðs við Sogndal. ,,Þetta er fallegur staður og allir sem ég hef hitt í dag hafa tekið mér vel.“

Tore Andre Flo, fyrrum leikmaður liðsins er nýtekinn við sem stjóri liðsins. Hann er mjög ánægður með að Hörður sé genginn til liðs við Sogndal.

,,Hann er með reynslu af því að spila fyrir land sitt og er spennandi leikmaður sem er mjög góður varnarlega. Hann er áræðinn í sínum leik og er gegnheill og sjálfstraustið skín í gegn í leik hans. Við höfum fylgst með honum lengi og skoðað hann bæði í gegnum myndbönd en einnig með því að tala við aðila sem þekkja vel til hans,“ sagði Tore Andre Flo, stjóri Sogndal.