Nú er loksins hægt að fá ítölsku jólakökuna Panettone í flestum stórmörkuðum landsins sælkerum til mikillar gleði. Ítalska jólakakan þykir ein sú besta og þeir sem eru heillaðir af ítalskri matargerð og bakstri segja að það sé ómissandi að eiga þessa um hátíðarnar.

,,Flestir Ítalir borða Panettone yfir hátíðarnar, en kakan er sögð koma upprunalega frá Mílanó. Hefðin er sú að eftir kvöldverð á aðfangadagskvöld halda Ítalir til messu en að henni lokinni gæða þeir sér á Panettone og dreypa jafnvel á Moscato d’Asti,” segir Gísli Þorsteinsson sölu- og markaðsstjóri Gæðabaksturs, sem framleiðir kökuna undir merkjum Ömmubaksturs.

Hann segir að ítalska jólakakan (eða brauðið) verði sífellt vinsælli á Norðurlöndunum og nú sé komið að Íslandi. ,,Uppskriftin er upprunalega frá Ítalíu en við framleiðum kökuna hjá okkur. Við vonumst til að kakan muni falla í góðan hljómgrunn hjá Íslendingum enda hafa þeir tekið ítalskri matarmenningu opnum örmum á liðnum árum.” Hægt verður að fá kökuna annars vegar með rúsínum og hins vegar súkkulaði.