Þýska stórveldið Bayern Munchen hefur áhuga á Pedri, 18 ára gömlum miðjumanni Barcelona. Þetta segir í spænska blaðinu AS.
Pedri skrifaði nýverið undir nýjan samning hjá Barcelona. Bayern er þó talið vilja fjórfalda laun leikmannsins til að krækja í hann.
Það yrði algjört högg í maga Barcelona og stuðningsmanna félagsins að missa Pedri. Hann hefur verið einn af fáum ljósum punktum þess undanfarið. Katalóníustórveldið á í miklum fjárhagsvandræðum og gengur illa í deildinni heima fyrir.
Pedri var í gær krýndur gulldrengur Evrópu. Segir það margt um hans hæfileika.
Pedri lék fleiri mínútur en nokkur annar leikmaður Barcelona á síðustu leiktíð og lék einnig á EM 2020, sem og á Ólympíuleikunum þar sem hann vann silfur með spænska landsliðinu. Hann hefur þó ekki spilað síðan í september vegna meiðsla í læri.
Pedri gekk til liðs við Barcelona frá Las Palmas árið 2020 og skrifaði undir nýjan samning við spænsku risana í október síðastliðnum. Riftunarákvæðið í samningi ungstirnisins er upp á einn milljarð evra.
