Ársþing KSÍ fer fram í febrúar en þá verður formaður sambandsins kosinn til tveggja ára, á sama tíma verður ný stjórn kjörinn. Vanda Sigurgeirsdóttir situr nú í embætti en það er til bráðabirgðar.
Vanda var sjálfkjörinn í embættið í byrjun í október þegar Guðni Bergsson hafði sagt af sér og stjórn hans gerði slíkt hið sama.
Orri Hlöðversson fyrrum formaður Breiðabliks er nú sterklega orðaður við framboð til formanns KSÍ. Hann var að láta af störfum sem formaður knattspyrnudeildar Breiðabliks en Orri á sæti í stjórn KSÍ.
Orri er formaður ÍTF og í gegnum það á hann sæti í stjórn KSÍ. „Yfirleitt eru tveir + tveir = fjórir. Orri skrifar fallegan pistil og segir takk fyrir sig og talar um önnur verkefni, ég held að þetta sé maðurinn sem ÍTF sé búið að velja. Að þetta sé þeirra kandídat,“ sagði Benedikt Bóas Hinriksson í sjónvarpsþætti okkar á Hringbraut í gær.
Ljóst er að ÍTF getur farið langt með að velja næsta formann enda eru á bak við þau samtök stærstur hluti atkvæði á ársþingi KSÍ.
„ÍTF hefur haldið spilunum þétt að sér, ef þú lest í þetta. Brynjar Níelsson, minn drauma kandídat. Ég er ekki viss hvort hann fari, Willum Þór er kominn í draumastöðu og hann fer ekki í þetta,“ sagði Benedikt.
Ekki er öruggt að einhver bjóði sig fram gegn Vöndu en Benedikt vonar að í febrúar verði farið að ræða meira um fótboltann hjá KSÍ frekar en málefnin utan vallar.
