Hannes Þór Halldórsson hefur samið um starfslok við Val og má búast við því að Valur tilkynni um það innan tíðar. Þetta herma öruggar heimildir 433.is.

Hannes og Valur hafa kastað boltanum sín á milli síðustu daga en samkomulag er í höfn um starfslok.

Markvörðurinn knái átti ár eftir af samningi sínum við Val en Heimir Guðjónsson þjálfari liðsins vildi losna við hann. Ljóst var að framtíð Hannesar var í lausu lofti hjá Val þegar félagið samdi við Guy Smit sem kom til félagsins frá Leikni.

Greint var frá því fyrir nokkrum vikum síðan að erfiðlega gengi fyrir Hannes að ná í forráðamenn Vals til þess að fá á hreint framtíð sína hjá félaginu. Í viðtali á útvarpsstöðinni K100 í október ræddi hann stöðu sína hjá Val.

,,Ég get alveg sagt eins og er og sagt hlutina eins og þeir eru. Ég veit að þjálfarinn vill ekki hafa mig hjá félaginu og ég hef hvorki heyrt hóst né stunu frá félaginu síðan mér var tilkynnt það. Ég veit ekki hvers vegna eða hvernig menn hyggjast leysa þá stöðu. Ég er steinhissa á þessari stöðu.“ sagði Hannes á K100.

Hannes er besti markvörður í sögu Íslands en hann hætti að leika með landsliðinu í haust. Hannes er 37 ára gamall en óvíst er hvaða skref hann tekur næst á ferli sínum. Hann á að baki 205 leiki í efstu deild hér á landi, hann hefur orðið Íslandsmeistari í þrígang og bikarmeistari í tvígang.